Quiero más ver el to cuerpu desnudu y cenciellu na cama que los corazones de xicolate nos escaparates del Corte Inglés.

Non, nun creo en San Valentín.
Nun voi mercate corazones de xicolate,
nin dedicate un cantar na radio local.

Quiero más nun saber nada de ti güei.
Quiero más que güei nun me llames.
Nun quiero pensar que'l nuesu amor ye eso:
Un productu d'escaparate del Corte Inglés.

Nun creo nel ánxel primorriverista
que col arcu y les fleches
quier pintanos un mundu rosa,
grande y llibre.

El nuesu amor nun foi nunca rosa.
Foi verde d'esperanza,
negru de cueru y llátigu,
de sexu xabaz.
Foi mariellu de confianza,
coloráu d'ira.
Foi, finalmente,
tresllúcidu de desamor,
opacu de desilusión.
Pa xorrecer, dacuando, verde
como un áve fénix.

Pero nun foi nunca rosa.

Quiero más esperar a mañana,
a que too seya normal y porque sí.
Ver la to desnudez cenciella na cama.
Quiero más sintir la to piel mañana,
cuando too seya normal y porque sí.
Calecer embaxo tuyo,
entrar en ti.
Selequino.

Porque sabes que siempre sólo se me dio bien querete a destiempu.
Porque nin a ti nin a mi nos presten los amores heróicos, y sí los amores cotidianos.



Uviéu, domingu 21-1-12

(de: http://juancarlosboveriarte.blogspot.com/2011/10/pere-pruna-y-las-mujeres-desnudas.html