Yo soi un uvieín.

Tengo señaldá de la ciudá na que vivo

dende va quince años.
Señaldá de les primeres veces.
De la primer vez qu'entré nesti cuartu.
De cuando andaba pel Milán.
De la primer vez que llegué tarde a clase
de Juan Tresguerres
Prehistoria Universal
y eche-y la culpa a los semáforos
de peones.

Tengo señaldá de les espiches y les tertulies.
Señaldá de la Casa Posafuelles.
Mesmo señaldá del Chigre'l Naranco.
Tengo señaldá del Esperteyu ya'l Ca Beleño.

Señaldá de les manis pola oficialidá,
de La Pita.
Desti cuartu nel qu'habité nel que siempre hebo
un escudu de Cuaña
colgáu na parede.
Un escudu que ta nel cuartu
qu'agora habito.

Porque siempre fui,
siempre seré
un cuañés.

Pero quince años,
quince,
rondando esta ciudá,
fainme uvieín.
Doce años viviendo en Vetusta,
trés na Corredoria y toos ellos rondando
los barrios d'abaxo.
Ventanielles,
El Postigo,
La Tenderina,
Teatinos, Pumarín ya'l Milán...
Quince años ayén al Oviedín del Alma,
viviendo l'Uviéu de los uvieínos,
onde tomar una botella sidra
nuna sidrería china
a ritmu de palmes flamenques.
Quince años
faen de min
un arguyosu uvieín.